(diary)Usa ako sa mga biktima sa budol-budol gang

Nitext ang akong mama na sugaton ang akong manghud sa eskina sa among balay. Niadto dayon ko aron akong atngan ang akong manghud. Sa dihang naghuwat pa ako niya, nireply pa ko sa akong mama na naa nako sa eskina ug ako dayon gisulod ang akong cellphone sa akong bulsa. Pagkataud-taod, naay nidool na ko na usa ka babaye na guwangon na. Nangutana siya kung naa ba akoy nahibaw-an na magpa-abang ug truck dinhi dapit sa among lugar. Nitubag ko ug wala ko kahibaw. Unya niana dayon siya na pwede ba daw nako siya ubanan mangutana atong tawo na nagbarog dapit sa may poste. Ako nalang siyang giubanan kay nalooy man ko niya sa iyang gisulti na gikapoy na siya sige pangita ug truck paabangan kay iyahang truck naguba ug kinahanglan siya moabang og lain para ihatod ang mga pusit padung sa Santander.

PAgdool namo sa tawo, nangutana dayon siya ug nakahibalo man ang tawo. Dili nalang unta ko mokuyog nila pero niana man ang babaye na pauban siya kay wala kuno siyay salig sa tawo mokuyog kay mura kini ug holdaper og nawng. Ako nalang siya gikoyugan. Pag-abot namo sa eskina kung diin nahimutang ang opisina na giingon sa tawo, niana dayon siya na magpabilin lang usa mi sa babaye aron siya nlang hangyo. Unya, pagtaud-taud naabot dayon siya. Ok na kuno ug pwede na moadto ang babaye sa opisina aron mobayad nalang. Gisekreto ko ug dool sa babaye na pwede ba daw ako nalang mogunit sa iyang kwarta kay magdala ra siya ug saktong bayad kay basig holdapon siya sa sulod sa opisina, iya pajud ko gipakita sa mga papel na kwarta, niana ko dili ko mosugot pero namogus man gyud siya. Nisugot nalang ko, iyang gisulod balik ang iyang kwarta sa iyang bag aron puston kini ug panapton. Aron pud daw makasiguro siya na dili nako daganon iyang kwarta, nangayo siya ug kapalit, iyang gikuha akong cellphone ug niana na iya rang ibalik pagkahuman dayon. Naghuwat nalang ko nila maabot pero hantud 1 oras nalang ang nilabay wala gigapon sila. Desidido mi sa akong manghud na ablihan ang panapton ug sa among dismaya mga papel ang sulod niini. Nakahilak ko sa akong pagkatanga niadtong higayona tungod sa nitabang ko atong babaye na mangingilad. Nisumpa ko sa akong kaugalingon na dili ko na to usbon pa.